ငရဲ တံခါး ပိတ်ပါစို့
ကလေးဘဝ ကတည်းက နားရည် ဝခဲ့တဲ့ စကားလေး
ဗုဒ္ဓဘာသာဝင် တို့ရဲ့ အသိုင်းအဝိုင်းမှာ အမြဲကြားရတတ်တာက ငရဲ မှာ အပ ဝဋ်မှာ အမြဲ ...တဲ့
၊ နားထဲမှာ စွဲနေခဲ့တဲ့ ဆိုရိုးလေး တစ်ခု ပါ ၊ ဘာကို ဘယ်လို ဆိုလိုသည်ကိုတော့
တကယ်ရေရေလည်လည် မသိခဲ့ ၊ မကောင်းတာ၊ မဟုတ်တာ လုပ်ရင် ငရဲ ကြီးမယ် ၊ ဝဋ်လိုက်လိမ့်မယ်လို့
လူကြိး ၊မိဘ ၊ဆရာ သမားတွေရဲ့ သွန်သင်ဆုံးမ စကားတွေကတော့ လူတိုင်းလူတိုင်းအတွက်
ကလေးဘဝကတည်းက ရင်းနှီးကျွမ်းဝင်ခဲ့တဲ့ စကားလေးတွေ ဖြစ်မယ်လို့ ထင်ပါတယ် ၊
ငရဲ ကြီးတယ်ဆိုတာ ဘယ်လိုပါလိမ့် ?
အတွေးအခေါ် ဗဟုသုတ မကြွယ်ဝသေးသည့် ကလေးဘဝကို လွန်မြောက်လို့ အရွယ်လေးရောက်
လာတော့ ငရဲ ဆိုတဲ့ စကားရဲ့ အနက်အဓိပ္ပါယ်ကို အနည်းငယ် သိနားလည်စ ပြုခဲ့ပါတယ် ။ ဗုဒ္ဓ
စာပေများ သင်ယူရတဲ့အခါမှာတော့ ချမ်းသာကင်း၍ အမြဲ ဆင်းရဲဒုက္ခ ခံစားနေရသော ဘုံ
ဋ္ဌာနကို ငရဲ ဘုံလို့ ခေါ်ပြီး အဲဒီလိုဘုံဘဝမှာ အမြဲ ဆင်းရဲခြင်း နှင့် ဒုက္ခ
အတိပြည့်နေ ခံစားနေရသူကို ငရဲ သား လို့ ခေါ်တယ်ဆိုတာ နားလည် သိရှိ
သဘောပေါက်ခဲ့ပါတယ် ၊ ငရဲ ပြည်မှာ ငရဲ ခံရတယ်၊ ငရဲကြီးတယ်ဆိုတာကို ဘယ်လို
ဟုတော့ နားမလည်ခဲ့ပေမည့် ဖြတ်သန်းခဲ့ရတဲ့ ဘဝလမ်းတစ်လျှောက်က ကိုယ့်ပတ်ဝန်းကျင်
လူနေမှု ရှုခင်းကို လေ့လာ ခံစားကြည့်ပြီးတော့ အနည်းငယ် သဘောပေါက်သလိုပါပဲ ။
အသက်ရှင်လျှက် ..ငရဲ ကျသူ
စာရေးသူရဲ့ ရွာဦးဘုန်းတော်ကြီးကျောင်း ပတ်ဝန်းကျင်မှာ လူနေအိမ်များလည်း ကပ်လို့
တည်နေကြပါတယ် ၊ နေဝင်မိုးချုပ် ပြီဆိုရင် ဆဲ သံ ဆိုသံ တွေနဲ့အတူ ရိုက်နှက်သံ
၊ ငိုကျွေးသံတွေဟာ မကြားချင်အဆုံးပါပဲ ။ စားဝတ်နေရေး မပြေလည်လို့ကတစ်မျိုး ၊
လင်မယားချင်းရန်ဖြစ် ရိုက်နှက်ကြလို့ တစ်သွယ် ၊ မွေးထားတဲ့ ကလေးငယ်တွေက
ထမင်းဆာလို့ က တစ်မျိုး နဲ့ တော်တော်ဆိုးခဲ့ပါတယ် ၊ ခုအခါ ပြန်တွေးမိတော့မှ
သူတို့ဟာလဲ အသက်ရှင်လျှက်နဲ့ ငရဲ ခံနေရသလို ဖြစ်နေကြောင်း သဘောပေါက်ခဲ့တယ် ။
အိန္ဒိယ နိုင်ငံရဲ့ မြို့တော်ကြီးတွေ အသီးသီးကို လေ့လာရေး ရောက်ခဲ့တဲ့အခါ
လမ်းဘေးမှာ နေထိုင်သူ အများစုကို တွေ့ခဲ့ရဘူးပါတယ် ၊ တစ်နေရာတည်းမှာပဲ ကလေး လူကြီး
စုစည်းနေပြီး ဆင်းဆင်းရဲရဲ နေကြရ ထိုင်ကြရပါတယ် ၊ အဲဒီလို လမ်းဘေးနေ
လူတန်းစားကိုတွေ့မြင်ရတဲ့ အခါမှာလဲ နောက်ဘဝခံရမည့် ငရဲထက် လူ့ပြည်တွင် အသက်ရှင်လျက်နဲ့
ငတ်ပြတ်ဆင်းရဲ နေရခြင်းကိုလဲ ငရဲ လို့ ပြောနိုင်မလား တွေးခဲ့မိပြန်ပါတယ်။
မလေးရှား နေစဉ်ကာလတုန်းကလည်း ရာဝမ်း အရပ်ဘက်ရှိမြန်မာနိုင်ငံသား ဆေးရုံဆင်း
လူနာတွေကို လက်ခံ ပြုစု စောင့်ရှောက်ထားရာ ပြန်လည်ထူထောင်ရေးစခန်း တစ်ခုကို
သွားရောက် လှူဒါန်းခဲ့ဘူးပါတယ် ။ အဲဒီနေရာမှာ
ရောဂါအမျိုးမျိုးနဲ့ ခွဲစိတ်ကုသ ခံယူထားသူတွေ၊ အဖြစ်အပျက် မျိုးစုံနဲ့ ခြေပြတ် လက်ပြတ်တွေ
ဖြစ်ပြီး ခိုကိုးရာမဲ့ ဖြစ်နေကြသူတွေ များစွာကို တွေ့ခဲ့ရပါတယ် ၊ ကလေးမလေး
တစ်ယောက်ဆို မစင်သွားဖို့နေရာ မပါခဲ့လို့ ဗိုက်ကနေ ခွဲပြီး
ပိုက်ထုတ်ထားရသည်ကို တွေ့သိခဲ့ရဘူးပါတယ် ၊
ဒါတွေအပြင် မိမိတို့ ပတ်ဝန်းကျင်မှာ အဆင်မပြေမှုတွေ များစွာကြောင့် သောကတွေပူနေရ ၊
ပရိဒေဝမိးတွေ တောက်လောင်နေကြရတာတွေ ၊ ကိုယ်အင်္ဂါချို့တဲ့ပြီး လူစဉ်မမှီ သူတွေ
၊ စားရမဲ့ သောက်ရမဲ့ ခိုကိုးရာမဲ့ ဆင်းရဲသားတွေ အမြောက်အများကိုလဲ တွေ့မြင် ကြားသိ
နေပေရတဲ့အခါ ဒါသည်ပင်လျှင် အသက်ရှင်လျှက် ငရဲ ကျနေသူ များလို့
ခံစားနားလည်မိလိုက်ပါတယ် ။
ကိုယ်ပြုသည့်ကံ ...ကိုယ်သာ ခံ
ဆင်းရဲ နွမ်းပါးသော တဲအိမ်အတွင်းမှ အဘိုးအိုသည် မိမိကိုယ်ကို မိမိ အပြစ်တင်ခြင်းမှ
တပါး အခြား လုပ်ဆောင်ဖွယ်ရာ မရှိဖြစ်ပါလိမ့်မယ် ။ အိန္ဒိယ စကားပုံ တစ်ခုမှာ
ဖတ်ဖူးတာကတော့ ည ဘက်မှာ အိမ်မက် ကောင်းကောင်း မက်အောင် နေ့ခင်းဘက်မှာ
အလုပ်များကို လုပ်ဆောင်ပါ တဲ့ ။ မြန်မာစကားပုံမှာတော့ နေပူတုန်း ကောက်ရိုးလှန်း၊
မိုးရွာတုန်း ရေခံ ၊ လသာတုန်း ဗိုင်းငင် စသည်ဖြင့် ရှေးလူကြီးတွေ ဆိုရိုးစကား
ထားခဲသည်ကို ဖတ်ရှုရဖူးပါတယ်၊ အသက်ကြီးသော အခါ ကြွယ်ဝ ချမ်းသာ သောကကင်းဖို့ ဆိုရင်
ငယ်စဉ်ကတည်းက ကြိုးစားအလုပ် လုပ်ဖို့ လိုတယ်ဆိုတာကို ပညာပေးချင်တာလို့
နားလည်ခဲ့မိပါတယ် ။
လူမိုက်နဲ့ ပညာရှိ ၊ လူချမ်းသာနဲ့ လူဆင်းရဲ တို့ရဲ့ ဘဝလမ်းခွဲဟာ ကျောင်းဝင်းထဲမှာ
ရှိပါတယ် ၊ ကျောင်းနေပျော်၍စာတော်အောင် ကြိုးစားခဲ့သူများ အနေဖြင့် ပညာတတ်မယ်
ရာထူး ဂုဏ်ရှိန် စည်းစိမ်ကြီးလို့ ကောင်းသည်ထက် ကောင်းအောင် လှူနိုင် တန်းနိုင်
အများအကျိုး ဆောင်နိုင်ခါ ဘဝအဆင့် မြင့်သည်ထက် မြင့်ကြရပေမဲ့ ငယ်စဉ်က ပျင်းအားကြီး
စာမကြိုးစားပဲ အဖေါ်မက်ပြီး အပျော်အပျက်ဘက်အတွက် အချိန်ကုန်များခဲ့မယ် ဆိုရင် တော့
ပညာမဲ့ဖြစ်မယ် ဆင်းရဲမယ် လူတောမတိုး လူရာမဝင်တာမျိုးကို ဆိုလိုတာလို့ အတွေးချဲ့
နားလည်မိပါတယ် ။ တစ်ချို့ကျတော့လဲ ငယ်ငယ်ကတော့ လိမ်မာ ရိုးသား
ကြိုးစားခဲ့ကြပါရဲ့.. အရွယ်လေး ရောက်လာတာ နဲ့အမျှ စိတ်ကစားမှုတွေနဲ့ အတူ
မကောင်းသူများ၏ အမူအကျင့်ကိုမှ အမြင့်ထင်ပြီး အတုယူလွဲမှားကြလို့
ပျက်စီးနေကြသူတွေလဲ မနဲ ပါဘူး ၊ ထိုကဲ့သို့သူတွေရဲ့
ဆင်းရဲ ကြမ်းတမ်းသော လောကဓံတွေနဲ့ သာ ဆုံဆည်းပြီး ပူပင် သောက ဗျာပါဒတွေနဲ့
အသက်ရှင်လျှက် ငရဲ ခံနေကြရခြင်းဟာလဲ အရင်းစစ်တော့ ကိုယ်ပြုတဲ့ကံ ကိုယ်ပြန်ခံ
ရတာလို့ ပဲ ဆိုချင်မိပါတော့တယ်။
ငရဲ နဲ့ ခြောက် မကြောက်ကြဘူး
အမြဲတမ်း ဆင်းရဲ ဒုက္ခနဲ့သာ ခံစားရနေတဲ့ ငရဲ ပြည်ဆိုတာ ခဏတဖြုတ် အလည်တောင်မှ
သွားမလည်သင့်တဲ့ နေရာ တစ်ခု ဖြစ်ပါလိမ့်မယ် ။ အကုသိုလ်အမှုနဲ့မှ
အကျိုးပေးကောင်းပြီး ချမ်းသာနေသူ အောင်မြင်နေသူ တစ်ချို့ကလဲ ငရဲ လောက်တော့
မကြောက်မယုံ မဖြုံ ကြပြန်ဘူး ၊ အဆိပ်သောက်ရင် သေတတ်တယ်ဆိုတာကို မယုံလို့ လက်တွေ့
စမ်းကြမယ်ဆိုရင်တော့ ဒုက္ခဆိုတာ ရလာဒ် ဖြစ်သွားမှာပဲလို့ ထင်မိတယ် ။ နောက်ဘဝ ခံရမည့်
ငရဲ ဆိုတာ ထားလိုက်ပါဦး ၊ ဒီဘဝမှာတင် အဆင်မပြေမှု ဗလပွ နဲ့ ဒုက္ခ တွေ ရောက်ကြရ ၊
ကိုယ်ဆင်းရဲ စိတ်ဆင်းရဲ ဖြစ်ကြရနဲ့ အပူတွေများဟာ ပူပြင်းလှပါတယ် ၊။
အပြင်က ရာသီဥတု ဘယ်လောက်ပူပူ အတွင်းက ကိလေသာ အပူကိုတော့ မမှီပါဘူး ၊
လောဘဇောတက်ပြီး ပူရတာရှိသလို ဒေါသတွေထွက်လို့ ပူရတာလဲ ရှိပါတယ် ၊ သားရှိသောသူ
သားကြောင့် ပူရသလို ကားရှိသောသူ ကားကြောင့် ပူနေရတာပါပဲ ။ ပူပြင်းပါတဲ့ ငရဲဆိုတာ
ဘယ်လောက် ပူသလဲ မသိပေမယ့် လောကရဲ့ သောက အပူကတော့ ပူပြင်းလှကြောင်း ကိုယ်တွေ့တွေနဲ့
သိခဲ့ရပါပြီ ။
ငရဲ ဘာကြောင့် လားရတယ်
?
ဒီတော့ ငရဲ ဘာကြောင့် လားရသလဲ ဆိုတာ မေးစရာ တွေးစရာ တခုဖြစ်လာပါတယ် ။
အတိုချုံးပြီး ဖြေရရင်တော့ ငရဲ ရောက်ကြောင်း မကောင်းမှု အကုသိုလ် ဒုစရိုက်တွေကို
ပြုမိ မှား လို့ ဖြစ်တယ်လို့ ပြောရင် မမှားလောက်ဘူး ထင်ပါရဲ့ ။ အကျယ်ချဲ့ တွေး
ကြည့်ရင်ဖြင့်....
အပါးလယ် လို့
အပါယ်လားတယ်
တစ်ချို့သော သူတို့ဟာ စီးပွားရေး လူမှုရေး ဘာသာရေး စသည်ဖြင့် အများနှင့်
စုပေါင်းဆောင်ရွက်သင့်သည် အမှုကိစ္စ များတွင် အပါးခိုနေလေ့ ရှိကြပါတယ်။ ကောင်းမှုကုသိုလ်ပြုရာမှာလဲ
ဒီနည်းတူပါပဲ ၊ ကောင်းတာကြံဖို့ ပြောဖို့ လုပ်ဖို့ဆိုရင် ဝန်လေးနေပြီးတော့
သောက်မယ် စားမယ် ပျော်မယ် ပါးမယ် ဆိုရင်ဖြင့် ထိပ်ဆုံးက ကျွန်တော်ဖြစ်နေတတ်ကြပါတယ်။
ဒီလို ကုသိုလ်အပါးမဝပဲ အကုသိုလ်အပါးဝသူတွေဟာ စိတ်ကောင်း နှလုံးကောင်းလဲ မရှိလို့ပဲ
ဖြစ်မှာပါ ။ အသင်းအဖွဲ့တွေမှာ နေရာတော့ ဝင်ယူကာ သူတို့နာမည်တော့ ပါဝင်စေလိုပြီး
တကယ် လုပ်ဆောင်ဖွယ်ရာ များမှာတော့ အပါးခိုနေကြ ခြင်းဟာလည်း လူပါးဝနေခြင်း
တစ်မျိုးလို့ နားလည်မိပါတယ် . သတ္တဝါတွေ ကျင်လည်ရာ သုံးဆယ့်တစ်ဘုံကို အစဉ်အတိုင်း
အထက်အောက် စီကြည့်မယ်ဆိုရင် လူ့ပြည် နှင့် အနီးဆုံး အောက်ဘုံဟာ ငရဲ ဘုံ
ဖြစ်နေတာကိုတွေ့ နိုင်ပါတယ် ၊ ငရဲ ဆိုတာ အပါယ်လေးပါးမှာ တစ်ပါး အပါအဝင်ဖြစ်ပါတယ်
။ အဲဒီလို သူတပါးရဲ့ မျက်ခုံးမွေးပေါ်တွင် စင်္ကြံလျှောက်လိုပြီး ကောင်းတဲ့အရာ
လုပ်ဖို့တွေမှာတော့ လူပါးဝ အပါးလယ်သူတွေဟာ အပါယ်လားပြီး ငရဲ သွားရတယ်လို့
ကောက်ချက်ချ ရပါလိမ့်မယ်။
အမျိုး
အမည်ကွဲပြား ..ငရဲ များ
တကယ်တော့ ငရဲ ဆိုတဲ့ စကားလုံးဟာ မြန်မာစကားအားဖြင့်မူ င နှင့် ရဲ ပေါင်းထားတဲ့
နှစ်လုံးသော စကားလေးမျှ သာပါပဲ ။ သို့သော်လည်း ဒီငရဲ ဘုံကို ကျစေနိုင်တဲ့
မကောင်းမှု့ ၊အကုသိုလ် ဒုစရိုက် ကွဲပြား ခြားနားသည်နှင့် အမျှ
ဆိုးကျိုးခံစားရတာကလဲ ကွဲပြား လေတဲ့ အခါ၊ ဒုစရိုက်သမား လူယုတ်မာ များစွာ အတွက်
လားရောက်ရာ ငရဲ ဆိုတာလဲ အမျိုးအမည်အားဖြင့် များစွာကွဲပြားသွားပါတော့တယ် ။
တံလျှပ်ကိုရေထင် ရွှေသမင် အလိုက်မှား ဆိုတာလို မကောင်းတာ ကိုမှ အကောင်းထင်ပြီး
လျှင် မဟုတ်တာကိုမှ အဟုတ်ထင် လုပ်ချင်သည့် ဒုစရိုက်ကောင်
ငမိုက်သားတို့မှာလဲ ငရဲ လားသည့်အခါ မိမိပြုခဲ့သည့် အကုသိုလ်အမှု
အကြီးအသေးအလိုက် ထိုက်ထိုက်တန်တန် ခံရပါတော့တယ်၊ ဥပမာအားဖြင့် ကမ္ဘာ့နိုင်ငံ အသီးသီးက
ကျင့်သုံးလျက်ရှိသော ပြစ်မှုဆိုင်ရာ ဥပဒေများမှာလဲ ပြစ်မှုကျူးလွန်သူများကို
အပြစ်ပေးရာတွင် အပြစ်ကျူးလွန်သူ၏ အမှု အကြီး အသေးအပေါ် မူတည်ပြီး ပုဒ်မ တပ် အပြစ်ပေး
အရေးယူ ပြစ်ဒဏ်ပေးခံရသလို ဖြစ်ပါတယ် ။ ပြစ်မှုကြီးလွန်းရင်လဲ သေဒဏ်ပေး ကြသလို
အကုသိုလ်အပြစ် ဒုစရိုက် အင်အား ကြီးမားလွန်းတော့လဲ အဝိီိစိ ဆိုတဲ့ ငရဲ
မှာပင် ကမ္ဘာအဆက်ဆက် ဒုက္ခ ခံစားရမှာဖြစ်ပါတယ် ။
ငရဲ
ကြီး..ငယ် အသွယ်သွယ်
မဟုတ်တာ အလုပ်များသူတို့ အဟုတ်သွားရမည့် ငရဲ ဘုံဆိုတာဟာလဲ အကြီးနဲ့ အငယ်
နှစ်သွယ် ကွဲပြားပါတယ် ၊ လူသိများတာက ငရဲ ဆိုသည့် စကားလုံးမှာ နှစ်လုံးမျှသာ
ဖြစ်ပေမဲ့ ငရဲ ကြီးက (၈)ထပ်တောင် ရှိပြီး ငရဲ ငယ်က လေး ထပ်
ရှိပါတယ် ။ ငရဲ ငယ်လေးခုကို အရပ်လေးမျက်နှာဖြင့် မြှောက်ပါက ငရဲ ငယ် ၁၆ ထပ်
ရှိလာပြီး ဒါကိုပဲ ငရဲကြီး ရှစ်ထပ်နှင့် ထပ်မံ မြှောက်ပွားပါက ဒုစရိုက်သမားတို့
ခံစားရမဲ့ ငရဲဘုံ အပြားဟာ တစ်ရာကျော်သွား ပါတော့တယ်။
ငရဲ တံခါး ဖွင့်နေသူများ
ငရဲ ရောက်နိုင်သည့် အကုသိုလ်ကံတွေအကြောင်းအရာကို လေ့လာကြည့်တဲ့အခါ အများစုသည်
သူ့အသက်သတ်ခြင်း စသော ငါးပါးသီလ ကိုယ်ကျင့်တရား ချို့ယွင်းကြလို့ ဖြစ်ပါတယ် ၊ ထို့အပြင်
မပြစ်မှားသင့်သော အနန္တော အနန္တ ငါးပါးတို့အား ပြစ်မှား စော်ကားခြင်း ၊ ခင်ပွန်းကြီး
ဆယ်ပါးအပေါ်ဝယ် ပြစ်မှားခြင်း စသော အကုသိုလ် ကံတွေကို တွေ့ရပါတယ် ၊ ဒါတွင်မက
သိင်္ဂါလောဝါဒသုတ်မှာ ဗုဒ္ဓမြတ်စွာ မိန့်မှာခဲ့သည့် ကျင့်ဝတ်အထွေထွေကို မကျေပွန်ရင်လဲ
ငရဲ လားနိုင်တာပါပဲ ၊ ဥပမာအားဖြင့် တာပန ငရဲ ဆိုတာဟာ အဂတိတရား လိုက်စားသူ ၊ လင်ယောကျာ်းကို
မထီ မဲ့မြင် အရေးမထား မလေးမစား လုပ် အနိုင်ကျင့်သူ၊ ဝတ္တရား
မကျေပွန်သူတို့ရဲ့ လားရောက်ရမည့် ငရဲ တစ်ခု ဖြစ်ပါတယ် ၊
သို့ဆိုပါလျှင် သူ့အသက်သတ် ခြင်း စသည်ဖြင့် ကိုယ်ကျင့်တရား ပျက်ပြားနေသူတွေ ၊
လင်ဖြစ်ပါလျှက် လင်ဝတ္တရား မကျေ ၊ မယားဖြစ်ပါလျှက် မယား ဝတ္တရားမကျေ ၊ သားသမီး ဖြစ်ပါလျှက်
သားသမီး ဝတ္တရား ကျေပြွန်အောင် မဆောင်ရွက်သူ စသည့် သူများဟာ ငရဲ တံခါးကို
ဖွင့်နေသူများလို့ ဆိုလိုက်ချင်ပါတော့တယ် ။
ငရဲ တခါး... ပိတ်စို့ လား
ငရဲ ဆိုတာဟာ ချမ်းသာကင်းပြီး အမြဲ ဆင်းရဲ ပူလောင်စွာ ခံစားရတဲ့ နေရာ၊ ဘုံလို့
အကျဉ်းအားဖြင့် နားလည်ခဲ့ပြီးတဲ့ နောက်မှာတော့ ငရဲ လားရောက်ရမှာကို
ကြောက်လာမိပါတယ် ၊ အဲဒီ ကြောက်စိတ်နဲ့ အတူ ကပ်ပါလာတာကတော့ ငရဲ မရောက်ချင်ရင် ငရဲ
ရောက်စေမယ့် မကောင်းမှု့ အကုသိုလ် ဒုစရိုက်တွေ မလုပ်မှ ဖြစ်မယ်ဆိုတာပါပဲ၊ဒီအပြင်
ရှောင်အပ်တဲ့ ဝါရိတ္တသီလ ၊ဆောင်အပ်တဲ့ စာရိတ္တ သီလ လို့ ခေါ်ဆိုရတဲ့ ကိုယ်ကျင့်တရား
တွေကိုလဲ မြှင့်တင်ရအုံးမယ် လို့ ကိုယ့်ဘာသာ နားလည်ခဲ့မိပါတယ် ။
ဒီလိုသာ ကောင်းတာကိုသာ ကြံ ၊ ကောင်းတာတွေသာ ပြော၊ ကောင်းမှု့တွေသာ
လုပ်မယ်ဆိုရင်ဖြင့် ဝဋ်မှာအမြဲ ငရဲမှာအပ လို့
ငယ်ငယ်ကကြားခဲ့ဖူးသည့် စကားအတိုင်းပင် ငရဲမင်းက ကိုယ့်ကို အပပြု ဖယ်ကြဉ် ပါလိမ့်မယ်
၊ ငရဲ ဆိုတာသည် ကိုယ်အတွက် လားရာ မဟုတ်တော့ပဲ ငရဲ တခါးသည်လည်း ပိတ်နေလိမ့်မယ်လို့
တဆက်တည်း တွေးမိလိုက်ပါတော့တယ် ။
မိဘ ဘိုးဘွား ကန်တော့ ပါစို့
ကျွန်ုပ်တို့အတွက် ပူပင်သောက ဗျာပါဒ ကင်း၍ စိတ်အေးချမ်းသာ ကိုယ်ကျန်းမာစွာ
လိုရာဆန္ဒ ပြည့်စုံရအောင် ဆိုရင် ငရဲ လားရောက်ကြောင်း မကောင်းမှု့တွေကို အပပြု
ရှောင်ကြဉ် ဖို့ အဓိကကျတယ်လို့ တွေးမိပြီးတဲ့အဆုံးမှာတော့ ဓမ္မမိတ်ဆွေ အားလုံးကိုလဲ
ငရဲ လားကြောင်း မကောင်းမှု့တွေ ရှိခဲ့ရင်တောင်မှ ပြေလျှော့ရအောင် ၊
ကုသိုလ်တွေတိုးပွားပြီး မကောင်းဘေးများ ရှောင်ရှားရအောင် အနန္တော အနန္တငါးပါး၊ ခင်ပွန်းကြီးဆယ်ပါးတို့ကို
ဒီလိုဝါကျွတ်ချိန်ခါမှာ ကန်တော့ကြပါစို့လို့တိုက်တွန်းလိုက်ချင်တာပါ ။
ဒီလို သက်ရွယ်ကြီးမား မိဘ ဘိုးဘွား ဆရာသမားတွေကို ကန်တော့ခြင်းဟာ မိမိအတွက်
ကုသိုလ်တွေ တိုးသလို ဘေးဆိုး ကိုလဲ လုံစေ ၊ အပါယ်ဘေးကိုလဲအထိုက်အလျှောက် တားဆီးပေးနိုင်တာပါပဲ
၊ဒါကြောင့် ဓမ္မမိတ်ဆွေများ အားလုံးကို ဘေးရန်ကင်းကွာ ကိုယ်စိတ်နှစ်ဖြာ ကျန်းမာ
ချမ်းသာကြပါစေ ၊ စိုးရိမ်ပူဆွေး ငိုကြွေးခြင်းဘေးက လွန်မြောက်နိုင်ပါစေ ဟု ဝါကျွတ်ဆုမွန်ပြုရင်း
ငရဲ တံခါး ပိတ်ပါစို့လို့ ဆန္ဒပြုလိုက်ရပါတော့တယ် ။
No comments:
Post a Comment